Print this page

Мўминнинг қалбида илоҳий муҳаббат ҳамда илоҳий қўрқувнинг муҳимлиги

Мўминнинг қалбида илоҳий муҳаббат ҳамда илоҳий қўрқувнинг муҳимлиги

 1-қисм

 

Бу мақола Шайх ҳазрат Ҳофиз Зулфиқор Аҳмад Нақшбандий Мужаддидийнинг (қ.с.) 2015 йилда Кўня шаҳрида ўқиган бир маърузасининг таржимасидир. Ушбу ваъз Мавлоно Жалолиддин Румий ҳазратларининг қабрларига яқин бўлган жойда сўзланди ва турк тилига Мавлоно Мурод Шафақ таржима қилди.    

 

الحمدلله وكفى وسلام على عباده الذين اصطفى عما بعد فاعوذ بالله من الشيطان الرجيم

بسم الله الرحمن الرحيم

ومن يطع الله ورسوله فقد فاز فوزا عظيما

سبحن ربك رب العزة عما يصفون وسلام على المرسلين والحمدلله رب العالمين

اللهم صل على سيدنا محمد وعلى آل سيدنا محمد و بارك وسلم

 

Ҳар ким ер юзида Аллоҳ жалла жалалуҳу ва Расулига соллаллоҳу алайҳи васаллам итоат этиб яшаса, у абадий саодатга ноил бўлади. Динимизда икки муҳим ҳукм бордир, биринчиси – амрлар, буйруқлар, яъни қилишимиз, бажаришимиз лозим бўлган амаллар, иккинчиси эса қайтариқлар, ман қилинган ишлар. Масалан намоз ўқиш, рўза тутиш сингари бажаришимиз шарт бўлган амаллар ҳамда номаҳрамга қараш, ёлғон гапириш, ҳасад қилиш, гина сақлаш, кибрли бўлиш сингари ман қилинган ишлардир.

Унинг буйруқларини бажариш учун эса банданинг қалбида Аллоҳ жалла жалалуҳунинг муҳаббати яъни севгиси бўлиши лозимдир.

 

ان المحب لمن يحب مطيع

(Бировни севиб қолган киши севганига итоат этади.)

Онанинг юрагида ўз боласининг севгиси бордир ва шу сабабли кеча-кундуз

беминнат, чарчамасдан боласига қарайди, хизмат қилади.

Айни шаклда қалбида Аллоҳ жалла жалалуҳу севгиси бўлган бир мўмин туну кун ибодат билан машғул бўлади ва амалларида бирор чарчоқни ҳис қилмайди.

Ўтмишдаги буюк олимларнинг қалблари Аллоҳ жалла жалалуҳунинг севгиси билан тўла бўлгани учун улар асло малолланмасдан ибодатда қоим бўлишар эди.

Имом Абу Ҳанифа роҳматуллоҳ узоқ йиллар хуфтон намозининг таҳорати билан бомдод намозини ўқиганларини биламиз. Пайғамбаримиз соллаллоҳу алайҳи васаллам кечалари шунчалик кўп ибодат қилар эдиларки, ҳатто муборак оёқлари шишиб кетарди...

Ҳазрат Фотима онамиз розияллоҳу анҳо бир гал хуфтон намозидан кейин икки ракат намоз ўқиш учун ният қилган, ўша намозда тиловатдан шу қадар завқ олганки, бомдод намозининг вақти кириб, салом бериб, қўлларини дуога очганларида шундай деганлар: “Эй Роббим, Сенинг кечаларинг шу қадар қисқаки, икки ракат намоз ўқиш билан тун тугаб қолди...”

 

Асосий дастур ушбудир – киши севганини кўришни истайди, у билан суҳбатлашишни, бирга бўлишни хоҳлайди. Банданинг Аллоҳ таолони бу дунёда кўриши мумкин эмас, аммо Аллоҳ жалла жалалуҳу бунинг учун бизга намозни берди. Киши намоз ўқиётган пайтида ҳеч бўлмаганда ўзини Аллоҳ таоло кўриб турганини ҳис қила олади.

أن تعبد الله كأنك تراه .

Банда Аллоҳ жалла жалалуҳу билан гаплашишни хоҳласа, Қуръони Каримни ўқисин, ҳадиси шарифда бу борада шундай марҳамат қилинади:

“Мўмин банда намозда “Алҳамдулиллаҳи Роббил Аламин”, деган вақтида Аллоҳ жалла жалалуҳу унга жавобан “Ҳамадани ъабдий” яъни: “Мўмин қулим Менга ҳамд айтди”, деб марҳамат қилади.

Мўмин бир оятни ўқиган пайтида Аллоҳ жалла жалалуҳу унга жавоб қайтаради ва худди мана шу шаклда давом этади.

Мўмин банда Аллоҳ таолони қаттиқ севади ва У билан бирга бўлиш учун зикрда давомли бўлади, чунки у то Аллоҳ жалла жалалуҳунинг зикри билан машғул бўлган муддатча Аллоҳ жалла жалалуҳу билан биргадир. Бир гал Аллоҳ таоло Мусо алайҳиссаломга шундай буюрди:

 

أتحب أن أسكن معك في بيتك يا موسى

“Эй Мусо, Мен сенинг уйингда сен билан бирга бўлишимни истайсанми?”

Ҳазрат Мусо алайҳиссалом Аллоҳ таолони ниҳоятда қаттиқ севувчилардан бири эди.

فخر لله ساجدا

Мусо алайҳиссалом дарҳол саждага бош қўйди ва шундай деди:

كيف تسكن معي في بيتي

“Эй Роббим! Сен қандай қилиб менинг уйимда мен билан бирга бўласан?”
Шунда Аллоҳ таоло шундай марҳамат қилди:

أنا جليس مع من ذكرني

“Ким Мени зикр қилса, Мен у билан биргаман!”

У ҳолда ҳар ким Аллоҳ жалла жалалуҳу билан бирга бўлишни хоҳласа, у банда Аллоҳ таолони кўп-кўп зикр қилсин, кимки Аллоҳ таоло билан гаплашишни хоҳласа, Қуръони Каримни ўқисин!

Кимки Аллоҳ таолони кўришни истаса, у ҳолда намоз ўқисин ва Қиёмат кунида Аллоҳ таолони кўришини тасаввур этсин!
Шу сабабли Аллоҳ таолони яхши кўрган киши Қуръони Каримни ўқишдан асло чарчамайди.

Ҳазрат Усмон розияллоҳу анҳу бундай деганлар: “Агар қалбингиз пок бўлсайди, Қуръони Каримни ўқишдан асло зерикмаган бўлардингиз”.

 

Имом Абу Ҳанифа роҳматуллоҳ Рамазон ойида Қуръони Каримни 63 марта хатм қилар эдилар, кундузлари ўттиз бор хатм, кечалари ҳам ўттизта хатм, яна алоҳида таровеҳ намозида жамоат билан бирга уч марта хатм қилар эдилар.

 

Имом Шофиий роҳматуллоҳ айтадилар:

“Бир гал Маккадан Мадинага боришим ўн олти кун давом этди ва шу муддат ичида ўн олти марта хатм қилдим”.

Бугун биз қулай уловларда сафарга чиқамиз, аммо бир неча саҳифагина бўлсин Қуръон ўқимаймиз... Улар эса от устида, туя устида тоғлардан ошиб ўтиб, терлаб-пишиб, шундай машаққатли сафар чоғида ҳам бир кунда бир марта хатм қила олар эдилар.

Ўзингиз бир ўйлаб кўринг, иссиқ кунда қаттиқ чарчаб, ишдан уйингизга қайтганингизда, хотинингиз сизга муздек айрон икром қилса, сиз унинг ҳар бир қултумини қандай завқ ва иштаҳа билан ичган бўлардингиз? Қалблари тоза бўлган кишилар ҳам Қуръони Каримни ўқиган пайтида ҳар бир оятдан худди шундай лаззат оладилар. Кичик ёшли болага музқаймоқ берсангиз, ҳар бир ютган луқмасидан қанчалик лаззат олса, Аллоҳ таолонинг дўстлари ҳам Қуръони Каримни ўқишдан худди шундай лаззат оладилар.

Бир гал мен бир болакайни кўрдим, у тўхтамасдан оғзини ҳаракат эттирарди. “Нима қиляпсан?” дедим қизиқиб. “Сақич чайнаяпман”, деди ва бир соат тинмай-тўхтамай маза қилиб чайнади. Шунда бирдан ақлимга шу ўй келди: “Аллоҳ таолонинг дўстлари ҳам тунлари ибодат қиларкан, бир оятни такрор-такрор ўқиш билан лаззат олишар эди”.

Ҳадиси шарифда Расулуллоҳ соллаллоҳу алайҳи васаллам бир кеча то тонгга қадар фақатгина ушбу бир оятни қайта-қайта ўқиганликлари ривоят қилинади:

 

إن تعذبهم فإنهم عبادك

Ҳазрат Оиша волидамиз розияллоҳу анҳо ҳақларида ҳам худди шунга ўхшаб, қуйидаги оятни такрор-такрор ўқиганликлари борасида ривоят келади:

 

وبدا لهم من الله ما لم يكونوا يحتسبون

Демак, кимнинг қалбида Аллоҳ таолонинг муҳаббати бўлса, Қуръони Каримни ўқиш, намоз ўқиш, Аллоҳнинг зикри билан машғул бўлиш унга жуда осон бўлади.

Бу ишларни бажаришни банда қалбдан хоҳлайди.

 

 Шайх Мавлоно Ҳофиз Зулфиқор Аҳмад Нақшбандий Мужаддидийдан (қ.с.)

 

 

Давоми бор.

Гулбаҳор Абдуллоҳ таржимаси. 

Мақолани улашиш